XAVI, ALONSO WATEMWA HISPANIA KUTOKANA NA MAJERUHI.

SHIRIKISHO la Soka la Hispania limethibitisha kuwa kiungo nyota wa klabu ya Barcelona, Xavi Hernandez ameenguliwa katika kikosi cha timu ya taifa wa Hispania kitakachopambana na Uruguay Jumatano kutokana na kusumbuliwa na majeraha ya goti. Kiungo wa Real Madrid Xabi Alonso tayari ameshaenguliwa katika kikosi hicho baada ya kuumia katika mchezo dhidi ya Granada ambao walifungwa bao 1-0 Jumamosi iliyopita. Inaaminika kuwa nyota huyo mwenye umri wa miaka 33 alipata majeraha hayo katika mchezo wa Jumapili usiku ambao Barcelona waling’ang’aniwa sare ya bao 1-1 na Valencia. Pamoja na kukosekana kwa nyota hao kwenye kikosi cha nchi hiyo lakini kocha Vicente del Bosque bado ana wachezaji wengine wazuri kuziba nafasi hizo kama Andres Iniesta, Juan Mata na Sergio Ramos.