WACHEZAJI SIMBA, YANGA WACHONGANISHWA KWA AHADI TAMU ZA FEDHA

WACHEZAJI SIMBA, YANGA WACHONGANISHWA KWA AHADI TAMU ZA FEDHA

Haruna Niyonzima kulia wa Yanga na Nassor Chollo wa Simba kushoto

MICHANGO inaendelea kuchangwa tangu juzi na wadau wa Simba SC dunia nzima, mwenye chochote anatakiwa kuchangia katika utaratibu maalum waliojiwekea kutunisha mfuko wa motisha kwa wachezaji wao kwa ajili mchezo wa leo wa Ligi Kuu ya Vodacom Tanzania Bara, dhidi ya wapinzani wao wa jadi, Yanga SC, Uwanja wa Taifa, Dar es Salaam.

 

 

Mwisho wa kuchangia mfuko huo ni saa 10:00 jioni na baada ya hapo idadi ya fedha zilizokusanywa zitahesabiwa na wachezaji wataambiwa, wakishinda leo watapewa kiasi gani cha fedha.

 

 

“Wachezaji watapewa ahadi yao wakati wanaingia uwanjani, watu wanaendelea kuchanga, ila morali ya timu ipo juu sana na tuna matumaini ya ushindi,”alisema kiongozi mmoja wa Simba, ambaye hakutaka kutajwa jina.

Kwa upande wa Yanga nako, inaelezwa ahadi tamu imekwishatolewa lakini haijalezwa haswa ni kiasi fani fedha.

 

 

“Wachezaji walikuwa na mazungumzo na viongozi jana, kwa kweli mambo mazuri, baada ya kikao walitoka na furaha kubwa, maana yake mambo mazuri,”kilisema chanzo kutoka Yanga.

 

 

Wapinzani hao wa jadi katika soka ya Tanzania, Simba na Yanga watashuka dimbani leo kwenye Uwanja wa Taifa, Dar es Salaam katika mchezo huo wa kwanza wa Ligi Kuu ya Vodacom Tanzania Bara, ambao utarushwa moja kwa moja na Televisheni ya Super Sport ya Afrika Kusini, kuanzia saa 11:00 jioni.

 

 

Simba, ambao ni mabingwa watetezi wa ligi hiyo, wanaingia kwenye mchezo wa leo, wakiwa na kumbukumbu ya ushindi wa mabao 5-0 katika mchezo uliopita Mei 6, mwaka huu dhidi ya wapinzani hao wa jadi.

 

 

Aidha, Simba inaingia kwenye mchezo wa leo, ikiwa inaongoza Ligi, baada ya kushinda mechi zake zote nne na kuvuna  pointi 12, wakati Yanga inashika nafasi ya tano kwa pointi zake saba, zilizotokana na sare moja, kufungwa mechi moja na kushinda mbili katika mechi nne ilizocheza.

 

 

Simba inatokea Zanzibar ilipoweka kambi kwa zaidi ya wiki moja kujiandaa na mchezo huo, wakati Yanga wanatokea hapa hapa Dar es Salaam, Double Tree By Hilton, walipoingia Jumapili usiku wakitokea Uplands, Changanyikeni walipoanzia kuweka kambi yao. 

 

 

Simba leo itawakosa beki wake Amir Maftah na mshambuliaji wake Emmanuel Okwi, ambao wanatumikia adhabu za kadi nyekundu, wakati Yanga ina majeruhi mmoja tu na wa muda mrefu, Salum Telela.